Seneng Jawa

lagu dolanan

cahjawa — Sat, 27 Feb 2010 07:28:56 +0000

DAYOHE TEKA

E.., dayohe teka,

5 2 3 5 6 1
E.., jerengno klasa,

5 2 3 5 6 1
E.., klasane bedah,

5 2 3 5 6 1
E.., tambalen jadah,

5 2 5 3 2 1
E.., jadahe mambu,

5 2 3 5 6 1
E.., pakakna asu,

5 2 5 3 2 1
E.., asune mati,

5 2 3 5 6 1
E.., guwangen kali,

5 2 5 3 2 1
E.., kaline banjir

5 2 3 5 6 1

E.., kelekna pinggir

5 2 5 3 2 1

LAGU-LAGU DOLANAN

cahjawa — Sat, 27 Feb 2010 07:22:19 +0000

CUBLAK-CUBLAK SUWENG

blak cublak suweng

6 6 5 3 2

suwenge ting gulenter

3 5 3 6 5 3 2
mambu ketundhung gudel

3 5 3 6 5 3 2
pak empong lera-lere

2 6 1 2 1 3 2
sapa ngguyu ndelikake

2 2 6 1 2 1 3 2
sir-sir pong dhele gosong

2. 3 2 2 1 3 2
sir sir pong dhele gosong

2. 3 2 2 1 3 2

SLUKU – SLUKU BATHOK

Sluku-sluku bathok

5 1 5 6 5 3
bathoke ela-elo

5 6 1 5 6 5 3
si rama menyang sala leh-olehe payung motha

5 6 1 5 6 5 3 3 5 6 1 5 6 5 3
pak jenthit lolo lobah wong mati ora obah

5 1 2 3 5 3 3. 5 3 2 3 5 3 3
yen obah medeni bocah yen urip nggoleka dhuwit

6 5 3 2 1 2 2 1 6 5 3 2 1 2 2 1

Islamic Widget

cahjawa — Tue, 29 Dec 2009 20:47:04 +0000

Islamic Clock

cahjawa — Tue, 29 Dec 2009 20:37:38 +0000

SUNGKEM

cahjawa — Tue, 15 Sep 2009 06:13:08 +0000

Dina agung Riyaya Idul Fitri enggal tumeka, dina kanggo apura ingapura. Kita mesthi nduweni kaluputan lan kakilapan, lan uga rasa keikhlasan paring pangapura marang liyan. Kanthi mangkono bakal tuwuh rasa rumangsa, mawas dhiri, paring pakurmatan marang liyan. Ana salah siji adat pakulinane wong Jawa kang isih katindakake yaiku sungkem. Sungkem mujudake kabudayan kang sipate adiluhung, amarga nduweni nilai-nilai moral, social, pendhidhikan, paseduluran lan adat istiadat. Sungkem mujudake kabudayan sing ngandhut pitutur lan piwulang luhur, amarga sungkem mujudake tumindak kanggo pangurmatan marang wong-wong kang luwih diwasa lan wong sing pancen kudu antuk pakurmatan. Sungkem uga bias nuwuhake rasa paseduluran, ngajeni marang wong tuwa lan sapepada, lan rasa toleransi marang liyan. Sungkem dudu kabudayan feodal kang mujudake laku ora demokratis, sungkem ora mung dilakoni ing kerton bae, nanging mujudake kabudayan kang kudu bisa dilakoni ing ngendi bae minangka tanda pakurmatan marang wong liya. Minangka kabudayan kang adiluhung mau sungkem bisaa dicakake dadi salah sijine “budi pekerti in action”. Pamrihe supaya generasi mudha ora rumangsa isin lan duwe panganggep menawa sungkem mau ketinggalan jaman lan mekiwuhi.

Geguritan

cahjawa — Fri, 04 Sep 2009 08:26:13 +0000

LAMPU BLENCONG

anggitanipun Suripan Sadi Hutomo

Lampu blencong ana ing pendhapa

Jarik lurik, mitraku jarik lurik

Wulangreh lan Wedhatama

Ing sajroning sak klambi bathik

Rembulan amping-ampingan mega

Rembulan amping-ampingan ranting

Saresehan lan sakabehing diskusi

Apa gunane yen ora tumanja

Endi guritanmu kang pungkasan?

Jarene arep padeg omah pagedhongan

Endi cerkakmu kang kebak kaendahan?

Jarene arep ngisi kapustakan

Jarik lurik, mitraku jarik lurik

Apa panjenengan sing pancen serik?

Carita Wayang

cahjawa — Fri, 04 Sep 2009 03:52:40 +0000

Rama Tambak

Sasampunipun Subali gugur, kerajaan Guwa Kiskendha dipunpasrahaken dhateng Sugriwa. Wiwit punika Sri Rama lajeng nyusun kekiyatan kanthi bantuan Sugriwa. Saderengipun Sri Rama ngutus duta inggih punika Anoman, saperlu nyuwun wangsulipun Dewi Sinta. Nanging saderengipun pepanggihan kaliyan Rahwana, Anoman manggihi Dewi Sinta saperlu ngaturaken kalpika paringanipun Sri Rama. Saupami dipunangge Dewi Sinta pas ateges Dewi Sinta taksih suci, nanging menawi boten pas ateges Dewi Sinta sampun boten suci malih. Pranyata kalpika kalawau pas dipunangge, ateges Dewi Sinta taksih suci. Salajengipun Anoman pados cara supados saged pepanggihan langsung kaliyan Rahwana. Anoman lajeng ngobrak – abrik taman Argasoka saengga dipunrangket dipundhepaken/dipunsowanaken wonten ngarsanipun Rahwana. Anoman nyuwun supados Rahwana mangsulaken Dewi Sinta, nanging Rahwana puguh boten purun kepara badhe dipuntohi ngantos pecahing jaja wutahing ludira. Anoman lajeng dipunbesmi wonten tengah alun – alun. Ananging Anoman saged uwal saking bebaya, kepara malah ngorak – ngarik latuning geni saengga ngobong sakukuban kerajaan Ngalengkadiraja amung sisa griyanipun Togog lan Bilung ingkang sampun maringi toya dhateng Anoman saderengipun dipunbesmi.

Anoman wangsul, sowan dhateng Sri Rama lan nyariyosaken sedaya kedadosan kalawau. Sri Rama pitados bilih kasucianipun Dewi Sinta taksih kajagi, pramila mantep “sadumuk bathuk sanyari bumi”. Kanthi pambiyantunipun para prajurit wanara, Sri Rama tumuju dhateng Alengka diraja. Sri Rama bingung amargi wonten samudra ingkang ngalang – alangi sedyanipun tumuju dhateng Alengka diraja. Sri Rama boten saged ngendhaleni emosinipun tanpa menggalih lajeng nglepasaken jemparing Guwa Wijaya sanalika samodra dados umob damel gendra isining samodra.

Dewa Baruna lajeng manggihi Sri Rama

Dewa Baruna : “Ngger dadi titah kuwi aja grusa – grusu, aja gawe sengsaraning titah liya kang tanpa dosa, aja cupet nalarmu kudu mbok petung dhisik!”

Sri Rama : “Dhuh Pukulun, nyuwun agunging pangaksama, amargi kawula bingung badhe tumindak kados pundi?”

Dewa Baruna : “Ngene bae Ngger, Sira gawea bendungan kanggo dalane prajuritmu menyang Alngkadirja”

Sri Rama : “Kados pundi prajurit kula saged damel bendungan utawi nambak samodra menika? Amargi prajurit kula kethek boten saged nyilem?”

Dewa Baruna : “Sira ora susah kuwatir, mengko takwenehi bantuan prajurit kethek sing bisa nyilem menyang dhasaring samodra. Nanging mengko sira aja kaget karo wujude prajurit kethek saka bantuanku, amarga wujude sirah werna –werna jumbuh karo saanane kewan samodra”.

Sri Rama : “Menawi mekaten matur nembah nuwun Pukulun lan nyuwun tambahing pangestu”.

Pembangunan bendungan (tambak) tumuli kawiwitan. Anggenipun mbangun ngantos pinten – pinten candra. Nalika meh dumugi Ngalengkadiraja bendungan jebol, pondhasi longsor. Sri Rama lajeng utusan Anoman nlesih kedadosan punika. Anoman lajeng utusan kapi Yuyu Ringking (kethek asirah yuyu) nyilem dhasaring samodra. Pranyata wonten ingkang ngrusak bendungan inggih punika prajurit raseksa asesirah diyu utusanipun Prabu Rahwana kanthi nama Yuyu Rumpung. Lajeng tuwuh perang tanding antawis Yuyu Rumpung lumawan kapi Yuyu Ringking. Kapi yuyu Ringking kawon lajeng matur kalih Anoman pados cara supados Yuyu Rumpung medal saking dhasaring samodra. Anoman utusan kapi yuyu Ringking nantang Yuyu Rumpung. Amargi kebrongot, Yuyu Rumpung medal saking dhasaring samodra, ngetingal ing lumahing samodra. Saking angkasa Anoman banjur namani yuyu Rumpung ngangge gunung ingkang sampun disiyapaken saderengipun. Sirahipun Yuyu Rumpung pecah, Yuyu Rumpung nemahi tiwas.

Pungkasanipun pedamelan bangun bendungan / tambak rampung dumugi kerajaan Alengkadiraja.

Legenda ing Pemalang

cahjawa — Fri, 04 Sep 2009 03:46:44 +0000

Legendha Desa Banyu Mudal

Kacarita dhuk nalika jaman Mataram panguwasane Sultan Agung Hanyakrakusuma, ana sawijining panggonan kang adoh saka ramening kutha praja, ana sawijining wanodya ayu sesulih Rara Juminten. Yen cinandra wanodya mau wah jan kurang tembung anggone arep nyandra, rikmane ngandhan-andhan, pakulitane kuning nemu giring, mripate damar kanginan, pasuryane ayu pisan. Panganggone nyamping bathik, slendhang pangsi kang direnggani peniti, kalung, subang, gelang lan binggel kabeh sarwa emas, prasasat kaya dene widodari kang mudhun saka kahyangan.

Wis ayu rupane Rara Juminten uga klebu wanodya kang grapayak semanak, karo sapa bae tansah aweh tetulung. Dheweke duwe kaluwihan tansah kecukupan kabutuhan banyune, senajan ketiga dawa ngenthak pisan.

Sawijining dina para warga nekani Rara Juminten, pamrihe njaluk tulung supaya Rara Juminten gelem mbiyantu nudhuhake sumber tuk banyu supaya warga ora padha ngalami kurang banyu. Banjur semedi telung dina suwene Rara Juminten oleh wangsit saka Dewi Rantansari. Isining wisik warga desa bisa oleh banyu kanthi syarat werna telu, sepisan srana ngorbanake jejaka kang umure isih mudha taruna kang disebut bujang kumala jengking, Rara Juminten njaluk supaya kurbane mau diganti kebo lan ditrima, syarat kapindho nyepakake rujak polo, iki uga ditulak lan dijoli bubur sunsum diwenehi gula Jawa 40 takir. Syarat kaping telune perawan sunthi banjur diganti ayam kang isih kumadara warna putih.

Upacara sesaji kanggo ngleksanakake panjaluke Dewi Rantansari diwiwiti ing panggonan kang wis ditentokake. Kebo disembelih daginge dijupuki sithik mbaka sithik banjur digule srana bumbu rujak wuni. Uga tumpeng damar murub, yaiku tumpeng kang ndhuwur pucuke sing lancip ditancepi sate diwenehi rerenggan brambang abang lan lombok abang 40 iji, jajan pasar arupa gedhang pitung warna, gantal (kinang ayu) kanthi sisik kuning 40 iji, kembang cepaka 40 iji, kecokbang, arang-arang kambang, bulus angrem sarta sawenehe omben kayata: jembawuk, kopi bubuk, kopi polong, teh diyang, godhong srep, jampang piyas, degan, rokok, lan dupa. Kabeh sesaji mau diwadhahi ing tampah dilemeki kain putih. Dene para wong lanang gawe pring dilancipi utawa digranggrang.

Kabeh warga rame-rame nggawa sesaji menyang panggonan kang ditudhuhake dening Rara Juminten. Para wong lanang padha ngrangrang lan ing panggonan kang dipendhemi ndhas kebo mau metu tuke. Saya suwe tuk mau saya gedhe banyune kang mili akeh kaya kali saking bantere iline tuk nganti banyune medal mudal. Saka kedaden iku ing panggonan metune banyu banjur kawentar minangka desa banyu mudal dene panggonan iline banyu kang digranggrang mau kawentar minangka kali Granggrang.

(Jarwan bebas saka Pemalang Post Mei 2005)

Salam

cahjawa — Wed, 26 Aug 2009 03:34:15 +0000

Sugeng nglampahi ibadah siyam ing sasi Ramadhan, mugi tansah pikantuk kanugrahaning Gusti Ingkang Murbeng Dumadi..

Unggah – ungguh Basa Jawa

cahjawa — Tue, 28 Jul 2009 10:17:24 +0000

Yudi : “Assalamualaikum, Pak!”

Bu Karto : “Waalaikumsalam, Nak. Badhe wonten keperluan menapa nggih Nak?”

Yudi : “Badhe nyuwun pirsa Bu, Punapa leres menika dalemipun Pak Karta?”

Bu Karto : “Ya, ana perlu karo bapak ya?”

Yudi : “Nggih.”

Bu karto : “Kene mlebu!”

Pak Karto : “Ana perlu apa Nak Yudi?”

Yudi : “Kula dipunutus Pak Lurah supados ngaturi pirsa bilih mangke dalu wonten rapat pengurus RT, panjenengan dipunsuwun rawuh wonten bale dhusun.”

Pak Karto : “Jam pira?”

Yudi : “Jam pitu dalu.”

Pak karto : “Oh jam pitu.”

Yudi : “Nggih kula nyuwun pamit Pak, badhe nglajengaken malih. Assalamualaikum.”

Pak Karto : “Wa’alaikumsalam.”